ევროკომისიის მიერ დანერგილი ინსტიტუციური განვითარების ინსტრუმენტის მხარდაჭერით, შოთა რუსთაველის ეროვნულ სამეცნიერო ფონდს ეწვია ფინეთის ბიოცენტრის (Biocenter Finland) დირექტორი, ფინეთის აკადემიის, ფინეთის კვლევის საბჭოს ყოფილი ვიცე-პრეზიდენტი, პროფესორი მარია მაკაროვი. ვიზიტის ფარგლებში, პროფ. მაკაროვი გაეცნო მეცნიერების სფეროში საქართველოში არსებულ ვითარებას, შოთა რუსთაველის ეროვნული სამეცნიერო ფონდის პროგრამებისა და საგრანტო კონკურსების ადმინისტრირებას და რამდენიმე ნაწილისაგან შემდგარი საექსპერტო მისიის შედეგად, მოამზადებს რეკომენდაციებს მეცნიერების მართვის გაუმჯობესებისათვის. არსებული კვლევითი-სამეცნიერო გარემოსა და პოტენციალის უკეთ გაცნობის მიზნით, 11 იანვარს შოთა რუსთაველის ეროვნულ სამეცნიერო ფონდში ჩატარდა საინფორმაციო - გაცნობითი შეხვედრა სამეცნიერო-კვლევითი ცენტრებისა და სახელმწიფო უნივერსიტეტების წარმომადგენლების მონაწილეობით.  

შოთა რუსთაველის ეროვნული სამეცნიერო ფონდი აგრძელებს მოკლევადიანი ინდივიდუალური სამოგზაურო სახელმწიფო სამეცნიერო გრანტების კონკურსის შედეგად დაფინანსებული პროექტების საჯარო პრეზენტაციების სერიას. გრანტის ყველა მფლობელი, მოგზაურობიდან დაბრუნების შემდეგ, დაინტერესებულ საზოგადოებას გაუზიარებს მეცნიერებაში მიმდინარე სიახლეებს. ვფიქრობთ, სხვადასხვა უნივერსიტეტის მეცნიერთა მიღწევების გასაცნობად, აკადემიური სფეროს ინტეგრირებისა და კვლევის შედეგების ურთიერთგაზიარების მიზნით პრეზენტაციები ჩატარდეს უნივერსიტეტებში. სხვადასხვა სფეროთი დაინტერესებულ ყველა მსურველს, განრიგის შესაბამისად, შეუძლია თავისუფალად დასწრება. პრეზენტაციების განრიგი იხილეთ ბმულზე: საქართველოს ტექნიკური უნივერსიტეტი ივ.ჯავახიშვილის სახელობის თბილისის სახელმწიფო უნივერსიტეტი

შოთა რუსთაველის ეროვნული სამეცნიერო ფონდი ავრცელებს ინფორმაციას კვლევითი სტიპენდიების მიღების შესაძლებლობის შესახებ. ამერიკული ორგანიზაცია ‘ ORAU ’ დაინტერესებულ პირებს სთავაზობს ფართო სპექტრის კვლევით სტიპენდიებსა და ვაკანსიებს სამეცნიერო პოზიციის დასაკავებლად აშშ-ში და ასევე მსოფლიოს სხვადასხვა ქვეყანაში არსებულ 300-მდე უნივერსიტეტსა თუ კვლევით ცენტრში. ორგანიზაცია ‘ ORAU ’ -ს სპეციალური საძიებო სისტემა Zintellect მეცნიერებს სთავაზობს პორტალზე საკუთარი მონაცემების/აპლიკაციის ატვირთვის საშუალებას. მეორეს მხრივ, Zintellect-ის განყოფილებაზე ‘შესაძლებლობების კატალოგი’ ( Opportunity Catalog) გამოქვეყნებულია განცხადება ასობით საგრანტო დაფინანსების/სტიპენდიის მოპოვებისა და ვაკანსიის შესახებ. ინფორმაციის დახარისხება შესაძლებელია სხვადასხვა პარამეტრის მიხედვით. დაწვრილებითი ინფორმაცია ‘ ORAU ’ - საძიებო სისტემა Zintellect - ის შესახებ ხელმისაწვდომია თანდართულ პრეზენტაციაში . ასევე, შეგიძლიათ ეწვიოთ ვებ-გვერდს www.zintellect.com

შოთა რუსთაველის ეროვნული სამეცნიერო ფონდი გილოცავთ შობა - ახალ წელს!

შოთა რუსთაველის ეროვნული სამეცნიერო ფონდი ავრცელებს ინფორმციას, რომ საქართველოს პარლამენტმა მოახდინა ჰორიზონტი 2020 პროგრამაში ჩვენი ქვეყნის ასოცირების შეთანხმების რატიფიცირება და საქართველო პროგრამის სრულუფლებიანი ასოცირებული ქვეყანა გახდა. საქართველოს ხელისუფლების ძალისხმევით, 2016 წლის 1 იანვრიდან ქართველ მონაწილეებს ჰორიზონტი 2020-ის პროგრამაში, შეთანხმების რატიფიცირებამდე, დროებით ასოცირებული წევრის სტატუსით შეეძლოთ მონაწილეობის მიღება. ჰორიზონტი 2020 პროგრამაში, ასოცირებული ქვეყნის სტატუსი ქართველ მეცნიერებს, მკვლევარებს და ინოვატორებს, ასევე, საქართველოში დაფუძნებულ იურიდიულ პირებს (უნივერსიტეტები, კვლევითი დაწესებულებები, მცირე და საშუალო საწარმოები, კვლევებზე ორიენტირებული ინდუსტრია, არასამთავრობო ორგანიზაციები, ბიზნეს კომპანიები, ფონდები, სამთავრობო დაწესებულებები და ა.შ.) აძლევს უფლებას, იგივე პირობებით და უფლებებით ისარგებლონ, რითაც სარგებლობენ ევროკავშირის წევრი სახელმწიფოების წარმომადგენლები. ჰორიზონტი 2020-ის კონკურსებში გამარჯვების შემთხვევაში, ქართულ კვლევით და ინოვაციურ ორგანიზაციებს შეეძლებათ მოიხიდონ ასი ათასობით ევროს საგრანტო დაფინანსება, განახორციელონ კვლევები საქართველოში, უმასპინძლონ დამწყებ თუ გამოცდილ მკვლევარებს მსოფლიოს სხვადასხვა კუთხიდან, ხორცი შეასხან სამეცნიერო და ინოვაციურ იდეებს და გააძლიერონ კვლევითი ცენტრები საქართველოში. საქართველოს პარლამენტის დადგენილება „საქართველოსა და ევროკავშირს შორის ევროკავშირის პროგრამაში „ჰორიზონტი 2020 − კვლევისა და ინოვაციის ჩარჩო პროგრამა (2014−2020)“ საქართველოს მონაწილეობის შესახებ“ შეთანხმების რატიფიცირების თაობაზე  

გამოქვეყნდა Marie Skłodowska-Curie Actions (MSCA)-ის 20 წლის იუბილესადმი მიძღვნილი კონფერენციის მასალები. მიმდინარე წლის 29 ნოემბერს ბელგის სამეფოში, ქ. ბრიუსელში ჩარატდა ევროკავშირის კვლევისა და ინოვაციის ჩარჩო პროგრამა ,,ჰორიზონტი 2020“-ის ერთ-ერთი შემადგენელი კომპონენტის -   Marie Skłodowska-Curie Actions (MSCA)-ის 20 წლის იუბილე. ღონისძიების დღის წესრიგი მოიცავდა Marie Skłodowska-Curie Actions -ის პროგრამების მიმოხილვას  მისი დაარსების დღიდან. წარმოდგენილი იყო MSCA სხვადასხვა მიმართულების მონაწილეთა მოხსენებები (Ted-style talks). საიუბილეო ღონისძიების შესახებ დეტალური ინფორმაცია და  მონაწილეთა მოხსენებების ვიდეო ჩანაწერები ხელმისაწვდომია ბმულზე.

ევროპული კვლევების საბჭომ (ERC) გამოავლინა ის  314 საუკეთესო მეცნიერი, რომელთაც დაფინანსება მოიპოვეს საგრანტო სქემით - ERC Consolidator Grants.  საერთო დაფინანსება შეადგენს 605 მილიონ ევროს (პროგრამა ,,ჰორიზონტი 2020“-ის ნაწილი - 'Excellent Science'). დამატებითი ინფორმაციის მისაღებად ეწვიეთ ვებ-გვერდს. იხილეთ გამარჯვებული მეცნიერების ჩამონათვალი.   საგრანტო სქემა ERC Consolidator Grants 2016 - სტატისტიკა პროექტების მაგალითები.

2016 წლის 19 დეკემბერს, სასტუმროში „რედისონ ბლუ ივერია“ გაიმართა შოთა რუსთაველის ეროვნული სამეცნიერო ფონდის კონფერენცია - "სსიპ შოთა რუსთაველის ეროვნული სამეცნიერო ფონდის 2016 წლის საქმიანობის შედეგები და სამომავლო პერსპექტივები". კონფერენციაზე ფონდის თანამშრომლებმა დამსწრე საზოგადოებას გააცნეს: 2016 წელს ფონდის მიერ ადმინისტრირებული ეროვნული და ერთობლივი, საერთაშორისო კონკურსების შედეგები, მულტილატერალური პროგრამების ფარგლებში განხორციელებული აქტივობები, ფონდის მიერ დაფინანსებული კვლევითი პროექტების მიმდინარეობისას გამოვლენილი სირთულეები და გამოწვევები, კონკურსების შეფასების პროცედურები და კრიტერიუმები, ანგარიში საერთაშორისო გრანტებისა და საერთაშორისო პროგრამებში საქართველოს მეცნიერთა ჩართულობის შესახებ. კონფრენციაზე აგრეთვე განხილულ იქნა 2017 წლის გეგმები და სამომავლო პერსპექტივები. კონფერენციას ესწრებოდა 200-მდე სტუმარი - საქართველოს განათლებისა და მეცნიერების მინისტრის მოადგილეები, საქართველოში აკრედიტებული უნივერსიტეტების რექტორები, პრორექტორები, სამეცნიერო დეპარტამენტებისა და კვლევითი ინსტიტუტების ხელმძღვანელები, საერთაშორისო სამეცნიერო სააგენტოებისა და პროგრამების ეროვნული საკონტაქტო პირები და მეცნიერების განვითარების საკითხებით დაინტერესებული სამიზნე ჯგუფები. ჩატარდა ოთხი სესია. თითოეული სესიის შემდეგ გაიმართა კონსტრუქციული დისკუსია. იხილეთ კონფერენციაზე მომხსენებელთა პრეზენტაციები: 2016 წლის ანგარიში ფონდის 2017 წლის კონკურსების კალენდარი და სამომავლო განვითარების პერსპექტივა პროგრამები, შეფასების პროცედურები 2016 - ცვლილებები და პერსპექტივები 2017 პროექტის მომზადების პროცესი: გამოწვევები, პრობლემები, ხშირად დაშვებული შეცდომები შოთა რუსთაველის ეროვნული სამეცნიერო ფონდის საერთაშორისო ურთიერთობები IncoNet EaP პროექტის შედეგები, EaP PLUS ამოცანები GÉANT და საქართველო