საქართველოს განათლებისა და მეცნიერების სამინისტროს მიერ ევროკომიისადმი მიმართვის საფუძველზე და შოთა რუსთაველის საქართველოს ეროვნული სამეცნიერო ფონდის ორგანიზებით, 2017 წლის 4-7 დეკემბერს ევროკომისიის სპეციალური მხარდამჭერი ინსტრუმენტის, Policy Support Facility - ს ფარგლებში გაიმართა საერთაშორისო ექსპერტების პირველი ვიზიტი საქართველოში. სპეციალური მხარდაჭერის ინსტრუმენტი საქართველოსთვის ხორციელდება 2017 წლის ოქტომბრიდან 2018 წლის მაისამდე და  გულისხმობს დამოუკიდებელი, მაღალი რანგის საერთაშორისო ექსპერტების მხრიდან რეკომენდაციების შემუშავებას საქართველოს მეცნიერების, ტექნოლოგიებისა და ინოვაციების (STI) სისტემის გაძლიერების მიზნით. ექსპერტთა პანელს თავმჯდომარეობდა მაიკლ შლიხტი, (გერმანიის განათლებისა და კვლევის ფედერალური სამინისტროს ეროვნული და საერთაშორისო სამეცნიერო პოლიტიკისა და უმაღლესი განათლების სისტემის ტრანსფორმაციის ყოფილი დირექტორი). მაიკლ შლიხტი 2012 წლიდან კვლევის, ტექნოლოგიური განვითარებისა და ინოვაციის (RTDI)  ფარგლებში ევროკავშირის ექსპერტთა  შეფასების (peer review) თანაავტორია ყაზახეთში, საქართველოსა და უკრაინაში. ექპერტთა პანელის შემადგენლობაში არიან აგრეთვე ექსპერტები ავსტრიიდან, პოლონეთიდან, ჩეხეთის რესპუბლიკიდან, ბულგარეთიდან/გაერთიანებული სამეფოდან და ჰოლანდიიდან (იხილეთ დანართი). პირველი ვიზიტის ფარგლებში შეხვედრები გაიმართა საქართველოს განათლებისა და მეცნიერების სამინისტროს, ეკონომიკისა და მდგრადი განვითარების სამინისტროსა და შოთა რუსთაველის საქართველოს ეროვნული სამეცნიერო ფონდის წარმომადგენლებთან. გარდა ამისა,  საქართველოში კვლევის, ტექნოლოგიებისა და ინოვაციების განვითარების კუთხით არსებული მდგომარების შესწავლისა და შემდგომი შეფასების მიზნით, 4-7 დეკემბერს გაიმართა სხვადასხვა შეხვედრა სახელმწიფო და კერძო კვლევითი უნივერსიტეტების, კვლევითი ცენტრებისა და სააგენტოების წარმომადგენლებთან. ექსპერტთა პანელი, ასევე, შეხვდა საბანკო და ბიზნეს სექტორისა და საქართველოში საერთაშორისო ორგანიზაციების წარმომადგენლებს. მისიის დასრულების შემდეგ, საერთაშორისო ექსპერტთა პანელის მიერ საქართველოს ოფიციალურ უწყებებსა და პირებს წარედგინებათ ექსპერტების მიერ  შედგენილი შესაბამისი რეკომენდაციები. Policy Support Facility-ის ფარგლებში, საერთაშორისო ექსპერტების მეორე ვიზიტი დაგეგმილია 2018 წლის თებერვალში.

შოთა რუსთაველის საქართველოს ეროვნული სამეცნიერო ფონდი ავრცელებს ინფორმაციას 2018 წლის მეცნიერებისა და ტექნოლოგიების გლობალური ინოვაციის (GIST) ტექნოლოგიური იდეის (Tech-I) კონკურსის შესახებ. ტექნოლოგიური იდეის კონკურსი შესაძლებლობას აძლევს მეწარმეებსა და ინოვატორებს მეცნიერებისა და ტექნოლოგიების დარგში, დაესწრონ ტრენინგებს და მოიპოვონ საწყისი კაპიტალი. 2018 წლის GIST Tech-I კონკურსი იწვევს დამწყებ ეტაპზე მყოფ ინოვაციურ სტარტაპებს მეცნიერებისა და ტექნოლოგიების (S&T) ყველა სფეროში (მაგალითად: სოფლის მეურნეობა, განათლება, ენერგეტიკა გარემო, ჯანდაცვა, ინფორმაციული  და საკომუნიკაციო ტექნოლოგიები (ICT), ოკეანეები და კოსმოსის მეცნიერება). დამწყებ საფეხურზე მყოფ სამეცნიერო და ტექნოლოგიურ სტარტაპებს შეუძლიათ, გაწევრიანდნენ ერთ-ერთ Tech-I ჯგუფში. თითოეული GIST-თან ასოცირებული მენტორი აირჩევს სამ სტარტაპს გლობალური საჯარო არჩევნებით. 10 წამყვან სტარტაპს და მათ GIST-თან ასოცირებულ მენტორს კი დაუფინანსდებათ 2018 წლის სტამბოლის გლობალურ მეწარმეობის კონგრესის ბოლო ეტაპზე დასასწრებად საჭირო ვიზიტის ხარჯები. ფინალისტებს საშუალება მიეცემათ, თავიანთი იდეები საერთაშორისო დონეზე წარმოაჩინონ 2018 წლის გლობალური  მეწარმეობის კონგრესის (GEC)-ის მეშვეობით და მიიღონ 10 000 USD საწყისი კაპიტალის სახით. ამასთანავე, ყველა ფინალისტი მიიღებს მონაწილეობას ტრენინგში GEC-მდე და კონგრესის შემდეგ სამი თვის განმავლობაში. 2018 წლის Tech-I კონკურსის ორგანიზატორები  არიან ამერიკული ასოციაცია მეცნიერების განვითარებისათვის (AAAS) და VentureWell. განაცხადების მიღება 2018 წლის Tech-I კონკურსისათვის შესაძლებელია ამა წლის 28 დეკემბრამდე. განაცხადი უნდა მოიცავდეს სამეცნიერო და ტექნოლოგიური ინოვაციური პროექტის მოკლე შეჯამებას წუთ-ნახევრიან ვიდეო ჩანაწერთან ერთად. ვიდეო უნდა წარმოაჩენდეს ინოვაციურ პროდუქტსა და იდეას და უნდა გაიგზავნოს მოცემული ბმულის მეშვეობით: http://www.gistnetwork.org/content/gist-tech-i განაცხადების წარდგენა შეუძლიათ 18-დან 40 წლამდე ასაკის საქართველოს მოქალაქეებს, რომელთაც აქვთ ბიზნესი ან სურვილი ბიზნესის დაწყებისა GIST-ში მონაწილე რომელიმე ქვეყანაში. განსაკუთრებით წახალისებულია იმ ორგანიზაციების მონაწილეობა, რომლებიც მჭიდროდ თანამშრომლობენ ახალგაზრდა მეცნიერებთან და ინჟინერებთან (უნივერსიტეტები, ბიზნეს ინკუბატორები, ბიზნესის დამაჩქარებლები (accelerators)).

2017 წლის 01 დეკემბერს სასტუმროში „Holiday Inn Tbilisi“ 08:30-17:00 საათზე, გაიმართა შოთა რუსთაველის საქართველოს ეროვნული სამეცნიერო ფონდის მიერ დაფინანსებული საგრანტო პროექტის, ხელშეკრულება MG_CG_09-3004/5344 კონფერენცია: „საქართველოს უროლოგთა ასოციაციის ყოველწლიური კონგრესი: ონკოუროლოგიური დაავადებების მულტიდისციპლინარული მართვა“. კონფერენციას ესწრებოდნენ: საქართველოს უროლოგთა ასოციაციის წევრები, ქართველი უროლოგები, ონკოლოგები, რადიაციული ონკოლოგები და რადიოლოგები საქართველოს 20 სამედიცინო დაწესებულებიდან - სულ 200-ზე მეტი პერსონა. პროექტის მიზანი იყო უროლოგიური და ონკოუროლოგიური დაავადებების მართვის შესახებ ევროპის უროლოგთა ასოციაციის უახლესი რეკომენდაციების გაცნობა, ამ რეკომენდაციების კლინიკურ პრაქტიკაში დანერგვის გზების დასახვა და ქართველი პაციენტების მკურნალობის შედეგების გაუმჯობესება; საქართველოში უროლოგიური მეცნიერების განვითარების გზების ანალიზი და დაგეგმვა; ქართული უროლოგიური მეცნიერების ევროპის მასშტაბით პოპულარიზაცია და რეგიონში (კავკასია-ცენტრალური აზია) მისი წამყვანი როლის დამკვიდრება. პროექტის ფარგლებში ჩატარდა რთული შემთხვევების ანალიზი. სხვადასხვა სპეციალისტებმა საჯარო დისკუსიაში წარმოადგინეს დაავადებების მართვის მათეული პრინციპები. ყოველი სესიის ბოლოს იმართებოდა ინტერაქტიული დისკუსია აღნიშნული სპეციალისტების მონაწილეობით.   სამომავლოდ, კერძოდ ზაფხულში, საქართველოს უროლოგთა ასოციაცია გეგმავს კიდევ უფრო მასშტაბური კონგრესის მოწყობას მეტი ქართველი და უცხოელი დელეგატის მონაწილეობით.

2017 წლის 6 დეკემბერს, 14:30 საათზე, შოთა რუსთაველის სახელობის ქართული ლიტერატურის ინსტიტუტში, გაიმართა შოთა რუსთაველის საქართველოს ეროვნული სამეცნიერო ფონდის მიერ დაფინანსებული პროექტის ფარგლებში გამოცემული წიგნის "ქართული მწერლობის ინტერკულტურული მოდელი და ნაციონალური იდენტობის პრობლემა" პრეზენტაცია.

 2017 წლის 1-ელ დეკემბერს გიორგი ლეონიძის სახელობის ქართული ლიტერატურის სახელმწიფო მუზეუმში, 18:00 საათზე, გაიმართა, შოთა რუსთაველის საქართველოს ეროვნული სამეცნიერო ფონდის მიერ დაფინანსებული საგრანტო პროექტის,  „ლიტერატურის მუზეუმის ხელნაწერთა აღწერილობა და დიგიტალიზაცია“ პრეზენტაცია. პრეზენტაციას ესწრებოდა მუზეუმის ადმინისტრაცია, შესაბამისი კვლევითი ინსტიტუტების მეცნიერი თანამშრომლები, სსიპ - მასწავლებელთა პროფესიული განვითარების ეროვნული ცენტრის თანამშრომლები, პროექტით დაინტერესებული სტუდენტები (მაგისტრანტები და დოქტორანტები). პროექტის ხელმძღვანელმა, ლიტერატურის მუზეუმის უნიკალური წიგნების ფონდის კურატორმა, ფილოლოგიის დოქტორმა ია ღადუამ დამსწრეთ გააცნო პროექტი და წარუდგინა პროექტის ფარგლებში გამოცემული „ლიტერატურის მუზეუმის ხელნაწერთა აღწერილობის“ (XII-XIX საუკუნეები) ოთხი წიგნი, რომელშიც შესულია პროექტის ფარგლებში აღწერილი 2636 ხელნაწერი.

2017 წლის 5 დეკემბერს, ივ. ჯავახიშვილის სახელობის თბილისის სახელმწიფო უნივერსიტეტის I კორპუსში , 115-ე აუდიტორიაში, გაიმართა შოთა რუსთაველის საქართველოს ეროვნული სამეცნიერო ფონდის  ფუნდამენტური კვლევებისათვის სახელმწიფო სამეცნიერო გრანტის ფარგლებში დაფინანსებული პროექტის “მიგრაცია, შრომის მიწოდება და სკოლის მიღწევები: საქართველოს მაგალითზე“ პრეზენტაცია.  პრეზენტაციაზე წარდგენილ იქნა ორი კვლევა: „მიგრაცია და შრომის მიწოდება საქართველოში“ და „მიგრაცია და სასკოლო მიღწევები საქართველოში“.  ღონისძიებას ესწრებოდნენ თბილსის სახელმწიფო უნივერსიტეტის, თსუ-ს პაატა გუგუშვილის სახელობის ეკონომიკის ინსტიტუტის, CRRC საქართველოს, სოხუმის სახელმწიფო უნივერსიტეტის და ილიას სახელმწიფო უნივერსიტეტის წარმომადგენლები და პროფესორები.